Астана қаласында KiVa буллингке қарсы бағдарламасы бойынша семинар өтті

2024 жылғы 19 тамызда психологиялық қолдау орталығының мамандары Астана қаласында «Орта білім беру ұйымдарында KiVa буллинг бағдарламасына қарсы сынақтан өткізудің кейбір мәселелері туралы» тақырыбындағы семинарға қатысты.

Семинар барысында қатысушылар KiVa бағдарламасының негізгі мақсаттары мен міндеттерімен, сондай-ақ буллингтің алдын алу мен оған қарсы іс-қимыл бағытындағы тиімді тәсілдермен танысты. Сонымен қатар, пилоттық мектептерде бағдарламаны енгізу бойынша мониторинг тетіктері мен әдістемелік сүйемелдеу аспектілері талқыланды.

Аталған бағдарлама – Финляндияда әзірленіп, бүгінде көптеген елдерде табысты қолданылып жүрген, мектептегі буллингпен күресудің ғылыми негізделген моделі болып табылады. Бағдарламаның басты мақсаты – қауіпсіз және қолайлы білім беру ортасын қалыптастыру.

Алдағы оқу жылында өңірлік Психологиялық қолдау орталықтары Назарбаев Зияткерлік мектептерімен (НЗМ) бірлесе отырып, жоба енгізілетін пилоттық мектептерге әдістемелік қолдау көрсетіп, бақылау мен үйлестіру жұмыстарын жүргізетін болады.